孖妹S檔案：的士牌股樓連環震
20160124
東網電視
更多新聞短片
港股喺今年首15個交易日，跌足11日，認真唔生性，唔少股友都想知道啲「大水喉」唔玩港股，究竟會玩啲乜？孖妹為咗股友幸福着想，即時喺多個資產界別捐窿捐罅，搵專家朋友追蹤「水源」，點知發現咗股市、樓市、人民幣同的士牌投資之間嘅神秘四角關係！
張：誠達汽車管理執行董事張敬森
Kitty：我知你以前喺銀行做財富管理出身，依家幫客投資的士牌。現時股市、樓市都冇運行，連市區的士牌價都由舊年高位725萬元，回調咗一成六至608萬元，佢哋係咪會攬住一齊衰㗎？
張：香港的士牌投資特別之處在於94年起，政府已經冇再增發新牌照，而且佢係永久牌照，所以可以好似「家傳之寶」咁一代傳一代，有部分車主持有嘅牌係阿爺嗰輩傳落嚟，即使屋企已經冇人再揸的士，都會長線持有收租，有份感情喺度，唔會隨意賣，而且佢係抗通脹嘅收息工具，所以抗跌力較強；投資股票就唔同，對於大多數投資者嚟講，純粹只係賺錢工具，所以一旦遇到大跌市，就容易被拋售。
以市場深度比較，無疑股市同樓市深度係比的士牌市場深，如果股樓市況低迷，或者交投唔活躍，投資氣氛吹緊淡風並進入下跌周期，都會令投資者資金調動繃緊咗，呢個情況亦會影響的士牌投資，令投資意欲跌。再者，加息預期都會令股樓受累，的士牌價亦受牽連。
彩兒：呢「三兄弟」都係同撈同煲？
張：佢哋之間互惠關係更加明顯⋯⋯因為投資的士牌嘅資金回籠期最短係約7日，如果投資者未搵到好嘅股票或樓盤，又或者對市場存在疑慮，就會選擇抗跌力強嘅的士牌嚟做投資，一旦遇到可以重投股市或樓市嘅時機，就可以快速沽出的士牌，所以三者有一個互惠嘅作用。
相反，當股樓進入上升周期，有啲投資者會「畏高」，擔憂市場走勢摸頂而重投的士牌市場，貪佢可以有好嘅租金回報率，所以三個市場嘅資金係會互相流動。
Kitty：股、樓同的士牌堪稱「內地人投資三寶」，人民幣匯價升跌，對的士牌有冇特別影響？
張：內地投資者資金豐厚，唔少係抱住人有我有，乜都想試嘅心態去投資的士牌，公司現時有約兩至三成係內地客，其實佢哋對香港的士牌投資有信心，亦唔太在乎相關投資嘅套現速度，主因內地仲有其他投資項目，部分進取投資者可以一次過掃10架。
此外，佢哋重視安全感，鍾意投資實物，而且用人民幣嚟香港買的士牌，好似攞到大約「八折」，個牌仲係永久，啱晒佢哋心意。不過，人仔貶值，又唔見佢哋買得心急咗喎。
彩兒：的士牌價跌成咁，唔通風光不再？有啲專家話，隨住經濟環境轉差同Uber帶嚟挑戰，牌價仲有下調空間喎。
張：的士按揭息率同樓按相若，都係約2厘，年期最高28年，按揭成數仲高過樓，有八成半，所以可以話係用更少彈藥，已經可以買入相若價格嘅實物投資。以一個市區的士牌連新車約630萬元計，租金每日約860元，租金回報達5厘；假設以只畀約90萬元首期計，實際回報率可高達20厘㗎！
我對的士牌價持審慎樂觀態度，今次調整浪吸引眾多投資者查詢，相信走勢已見底回升，不過未來因應新界市區化，道路網持續發展，鐵路網勢引入人流，即使鐵路對的士而言存在競爭，但於新界區亦需的士駁腳，相反市區的士發展潛力冇咁大，所以未來較睇好新界的士牌前景，未來兩者牌價會逐步拉近。不過，值得留意嘅係，喺市面上逾1.8萬個的士牌中，市區與新界的士比例係5比1，所以紅的流通量無疑係高啲。
Uber的確有影響業界，但程度值得商榷，皆因好多人係因為截唔到的士或想試新嘢先Call，佢收費較的士貴，所以係搶都主要係搶豪華租車市場。
彩兒：你由金融圈轉職後，依家喺的士行仲搞埋網上Login帳戶睇月結單同投資月報嘅服務，果然係入晒血！哈哈！
－－－－－－－－－－－－－－－－－
傅：康宏理財副總監傅惠賢
彩兒：你一向有研究的士牌投資，到底呢啲牌「錢途」掂唔掂？
傅：的士牌未必跟股市、樓市走勢，市區的士牌係相關市場指標，近期各類資產價格下跌，令佢都有跟住下調。睇番03年沙士同08年金融海嘯時期，的士牌價走勢都相對股市波動，主因交易量唔多，但整體跌幅較樓市同股市細。
綜合嚟睇，的士牌屬於另類投資，走勢與股市相關度唔高，可以令投資組合更多元化，其實佢更加係一門生意，市區的士牌連車約630萬元，假設做七成按揭，按息約2厘，每月供車會要用1.8萬元左右，外行人搵車行代為管理，計及當中管理費，新車每月收2.2萬元，舊車可以收1.8萬元，咁操作就有超過4厘落袋，仲可以Cover每月供款！
Kitty：你咁講，搞到我心郁郁想置番架！
傅：咁就視乎你想尋求租金收入定係資產增值喇！經濟市道好，多人肯搭的士；市道差，多人失業，又會多咗人揸的士，所以收租無論係經濟好唔好都OK㗎。另一方面，早幾年聽聞有內地人會囤積的士放係新界車場，又冇租出去，所以先推高個牌價，依家似乎冇呢支歌仔唱。
現時的士牌價被以下因素影響：政府增加發牌與否、未來會否設牌照限期、加息情況、石油氣氣價，同埋的士車費會否加價等。的士牌投資租務回報都仲幾好，但以資產增值方面睇就麻麻。
彩兒：尋求資產增值幾時都係我最大嘅目標嚟㗎喎。
傅：2015年股、債、商品等投資類別都跌，今年又出現近百年嚟最差嘅開局，逆向思維去睇，唔會灰成咁，宏觀啲睇，或者已經係吸納股票嘅時機。首選科網及健康護理行業基金，現時科網行業同2000年科網股泡沫嗰陣係兩個世界，相關股份有盈利能力，成為大勢所趨；至於健康護理行業，主要受惠人口老化，相關醫品同服務係剛性需求，所以相關股票基金前景唔錯。
至於以地區嚟睇，我比較睇好歐洲，只係怕發生恐襲，當地仲係量寬階段，美國停止量寬令熱錢流出，可見歐洲應可受惠，建議揀有對沖歐元下跌嘅基金，進取投資者可揀中小型股基金。因應美國進入加息周期，唔建議增持債券。
─ ─ ─ ─ ─ ─ ─ ─ ─ ─ ─ ─
「東網Money18」fb專頁：有討論、有分析，齊來FUN享，贏盡●你Like